Сәбитов Рәшит Сәбитұлы 1936 жылы 8 мамырда Павлодар облысы, Лебяжі ауданы, «Жаңа таң» ауылында туған. 1954 жылы «Қызыл қоғам» ауылында Қызыл  әскер орта мектебін, 1959 жылы Қазақ Мемлекеттік университетінің журналистика факультетін бітірген.

1959 жылғы тамыздан 1968 жылғы қыркүйекке дейін Ақсу (бұрынғы Ермак), Май аудандық газеттері редакторының орынбасары болып істеген. 1970 жылы Алматы Жоғары партия мектебін бітірген соң сол жылы тамыздан желтоқсанға дейін Павлодар облыстық «Сарыарқа самалы» газетінің аға әдеби қызметкері міндетін атқарған.

Бұдан соң жиырма жыл бойы Қазақстан Компартиясының Орталық Комитеті жанындағы Партия тарихы институтының аға ғылыми редакторы болып қызмет істеген. 1992 жылдан 1997 жылы зейнеткер болғанға дейін ҚР Сыртқы істер министрлігінде бірінші хатшы, сектор, бөлім меңгерушісі, кеңесші болып еңбек еткен Рәшит Сәбитұлына Екінші хатшы дипломатиялық дәрежесі берілген.

Қазақстан Журналистер одағының мүшесі Рәшит Сәбитұлын «В.И. Ленин Шығармаларының 55 томдық толық жинағын қазақ тіліне аударуды жүзеге асыруда жемісті қызмет атқарғаны үшін» Қазақ КСР Жоғарғы Кеңесінің Президиумы 1983 жылғы 22 қарашадағы Жарлығы бойынша Жоғарғы Кеңестің Құрмет грамотасымен марапаттады.

Р.Сәбитов 1964 жылы «Тың және тыңайған жерлерді игерудің 10 жылдығы», 1989 жылы «Еңбек ардагері» медальдарымен марапатталған. 1990 жылы 16-тамызда Қазақстан Республикасы Президентінің Жарлығымен Рәшит Сәбитұлына «Қазақстан Республикасының еңбек сіңірген мәдениет қызметкері» құрметті атағы берілді.

Танымал ақынның топтама өлеңдері 1956 жылы «Жас жүрек», 1961 жылы «Тақпақ айтып, ән шырқайық» ұжымдық жинақтарында жарияланған. «Толқын» деп аталатын өлеңдер жинағы 1978 жылы «Жалын» баспасынан жарық көрді.

Әдебиеттер:

Сәбитов Рәшит. Туған жерім, дүманды елім (Өлеңдер мен дастандар жинағы, 1 кітап). - Павлодар: ЭКО, 2004. - 292 б.

Сәбитов Рәшит. Дүбірлі дүние (Өлеңдер мен дастандар жинағы, 2 кітап). - Павлодар: ЭКО, 2006. - 284 б.

Сәбитов Рәшит. Парыз бен қарыз (Өлеңдер мен дастандар жинағы, 3 кітап). - Павлодар: ЭКО, 2006. - 256 б.

Сәбитов Рәшит Сәбитұлы. Дүбірлі дүние. 2-кітап: өлеңдер мен дастандар жинағы .- Павлодар: ЭКО, 2006.- 284 б.

Сәбитов Рәшит Сәбитұлы. Қалың елім - қазағым:  дастандар мен толғаулар жинағы - Павлодар: ЭКО, 2011.- 264 б.